Կախարդական քարերի ուժը

Կիսաթանկարժեք քարերի շարքում, որոնք պատրաստ են իրենց արժեքով մրցել նույնիսկ ադամանդի հետ, առաջտար է համարվում ազնիվ (սև) ծիածանաքարը (օպալ):

Այս քարերի փայլն ու շքեղությունը հենց այն է, որ մուգ կապույտ հիմքի վրա տեսանելի են ծիածանի գրեթե բոլոր գույները: Հին արաբները համարում էին, որ ծիածանաքարը կայծակի ժամանակ երկնքից է ընկել: 

Կան այս քարի  բացառիկ տեսակներ, որոնց մեկ կառատը վաճառվում է 10 000 դոլարով: Սև ծիածանաքարի արդյունահանման 95 %-ը պատկանում է Ավստրալիային:

Ծիածանաքարը կամ օպալը հայտնի է մոտ 6000 տարի առաջ: Այն մեծ հարգանքի ու գնահատականի է արժանացել աշխարհի մեծահարուստների, թագավորների ու թագուհիների, առաջնորդների կողմից, սակայն միջնադարում  համարում էին, որ այս քարն է ժանտախտի տարածման պատճառը: Այն համարվում էր անհաջողության և դժբախտության  պատճառ: Այսպես օրինակ`Մարի-Անտուանետա կայսրուհին և նրա շրջապատը նախապատվություն էին տալիս օպալին, սակայն  նրանց կյանքն ավարտվեց գիլյոտինի միջոցով, Նապոլեոնը Ժոզեֆինային նվիրել էր հենց օպալե  զարդ` այդ ամուսնությունը ևս ավարտվեց ապահարզանով, Անգլիայի թագավոր Էդուարդ 7-րդը  հրամայել էր թագի վրայի բոլոր ծիածանաքարերը փոխարինել  սուտակով: Բելգիայի արքայադուստր Ստեֆանիան իր ամուսնու ինքնասպանությունից հետո հրաժարվել է բոլոր թանկարժեք ծիածանաքարերից:

Սակայն ժամանակի ընթացքում օպալի հանդեպ վերաբերմունքը փոխվեց: Սնահավատությունը,  թերևս, տեղի տվեց: 19-րդ դարից օպալը դարձավ մոդեռն ոճի խորհրդանիշը, այդ մասին է վկայում Սառա Բեռնարի զարդը` պատրաստված Ռենե Լալիկի կողմից: Այսօր  ծիածանաքարե թանկարժեք զարդերը նախընտրում են ոչ սնահավատ օլիգարխները:

Այսօր սև օպալի և art-nouveau-ի համադրությամբ է զբաղվում Boucheron նորաձևության տունը` մասնավորապես Dolce Riviera հավաքածուով:

Այս քարն իր բնույթով այնպիսին է, որ բնութագրելով նրա գունային խաղը կարելի է նույնացնել  իմպրեսիոնիստական գունախաղի հետ, ուստի դիզայներներին մնում է միայն համապատասխան շրջանակ գտնել դրանց ողջ հմայքն ու փայլը պահպանելու համար:

Van Cleef & Arpels-ը համարձակ քայլ է արել` ներկայացնելով եթովպիական օպալը կամ ծիածանաքարը իր California Rêverie հավաքածուում:

Chaumet-ը ստեղծել է սպիտակ ոսկով  և ավստրալական օպալով մատանի` շրջապատված ադամանդով և սաֆիրով: Ամերիկյան Tiffany & Co.-ն գտնում է, որ օպալը լավագույն մետաղին է արժանի` եզրագծելով այն պլատինե շրջանակով:

Սև ծիածանաքարը լայնորեն կիրառվում է նաև թանկարժեք ճարմանդների, ժամացույցների պատրաստման մեջ: Վերջինիս լավագույն օրինակ է Dior VIII Grand Bal Haute Couture-ը:

Հարցեր, պատասխաններ, մեկնաբանություններ